يعني إيه داتابيز علائقية؟

الداتا متخزنة في جداول

الداتابيز العلائقية (Relational Database) بتخزّن كل حاجة في جداول. وكل جدول بيمثّل نوع واحد من الحاجات: جدول للمنتجات، وجدول للعملاء، وجدول للطلبات.

• الصف (Row): حاجة واحدة بعينها. يعني صف واحد = لابتوب واحد.
• العمود (Column): صفة من صفات الحاجة دي، زي الاسم أو السعر أو الرامات. وكل عمود ليه نوع ثابت.

دي الجدول products في داتابيز الكورس. الكويري دي اتشغّلت لوحدها أول ما وصلت هنا، وده PostgreSQL حقيقي شغال جوه الصفحة:

SELECT * FROM products;

عدّل فيها براحتك وشغّلها تاني بـ Ctrl + Enter. كل تشغيل بيحصل جوه Transaction وبيتلغي في الآخر (ROLLBACK)، فمهما كتبت مش هتبوّظ الداتا.

ليه مش Excel؟

شيت Excel شكله جدول برضه. الفرق في الحاجات اللي الداتابيز بتمنعها وبتضمنها:

استكشف داتابيز الكورس

الكورس كله شغال على داتابيز محل لابتوبات: 7 جداول. دوس على أي جدول تشوف صفوفه. ولو وقفت على عمود عليه FK، الجدول اللي بيشاور عليه هينوّر. ودوس على أي قيمة صفرا في الجدول اللي تحت، هتنقلك للصف اللي بتشاور عليه.

الداتا دي متوسّخ فيها عن قصد، زي أي داتا حقيقية: منتج ملوش سعر، وعميل ملوش مدينة، وطلب مفيهوش منتجات، وعميل اسمه مكتوب small. كل حاجة من دول هتبقى فخ في درس من الدروس الجاية.

كل عمود ليه نوع

النوع بيحدد إيه اللي ينفع يتخزن، وإيه العمليات اللي تنفع عليه. ودي الأنواع اللي في داتابيز الكورس:

جرّب الكويري دي. الدالة pg_typeof بترجع نوع أي قيمة:

SELECT name, price, price * 2 AS double_price, pg_typeof(price) AS price_type, released_on, pg_typeof(released_on) AS date_type
FROM products;

ليه الفلوس مينفعش تتخزن float؟

الكمبيوتر بيخزّن الـ float بالـ Binary، وفيه أرقام عشرية مينفعش تتمثّل بالظبط، زي 0.1. شوف بعينك:

SELECT 0.1::float8 + 0.2::float8 AS float_sum,
     0.1::numeric + 0.2::numeric AS numeric_sum,
     (0.1::float8 + 0.2::float8) = 0.3 AS float_equals,
     (0.1::numeric + 0.2::numeric) = 0.3 AS numeric_equals;

0.30000000000000004، والمقارنة بـ 0.3 طلعت false. في بنك أو متجر بيعمل ملايين العمليات، الفرق الصغير ده بيتجمّع. علشان كده الفلوس دايماً numeric (أو decimal، وهو نفس النوع).

ولو حطيت قيمة من نوع غلط، PostgreSQL بيرفض. شغّل دي وشوف الخطأ متشرح إزاي:

SELECT name, price + 'abc' FROM products;

الصفوف ملهاش ترتيب

الجدول مجموعة، والمجموعة ملهاش أول وآخر. الصفوف متخزنة على الـ Disk بالترتيب اللي يريّح الداتابيز، والترتيب ده ممكن يتغيّر بعد UPDATE أو DELETE أو حتى مع تغيير خطة التنفيذ.

NULL: القيمة اللي مش معروفة

بص على عمود phone في الكويري دي:

SELECT id, name, city, phone, email FROM customers;

NULL مش صفر، ومش نص فاضي ''. معناه: القيمة دي مش معروفة. عميل phone بتاعه NULL ممكن يكون معندوش تليفون، وممكن يكون عنده بس ما سجّلهوش. الداتابيز مش عارفة.

أول كويري بإيدك

الشكل الأساسي:

SELECT عمود1, عمود2   -- الأعمدة اللي عايزها، أو * لكلهم
FROM اسم_الجدول;

• * معناها “كل الأعمدة”. مفيدة وانت بتستكشف، بس في الكود الحقيقي اكتب الأعمدة بالاسم: أوضح، وأسرع، ومش هتتكسر لو حد ضاف عمود.
• الـ ; في الآخر بتقفل الـ Statement.
• الكلمات المحجوزة (SELECT، FROM) مش حساسة لـ Capital و Small. بس العُرف إنها تتكتب Capital علشان تبان.

التمارين دي بتتصحح لوحدها: الموقع بيشغّل حلك والحل الصح على نفس الداتا ويقارن النتيجتين. ترتيب الصفوف مش مهم هنا، بس الأعمدة لازم تبقى نفس العدد وبنفس الترتيب.

SELECT name, country FROM brands;

SELECT name, price, stock FROM products;

SELECT id, name, role, salary FROM employees;

SELECT name, price, price * 1.14 AS price_with_vat FROM products;